فلسفة التحليل .. بدون تعقيد
السلام عليكم ورحمة الله الشيوخ
شكرا على تقديرك وزيارتك للموقع
اللي أرجو بأن يكون فيه الخير والبركة على الجميع
من هو سليمان ؟
أظن من المهم بداية أن أوضح بأن أخوك
سليمان النقبي (بو سالم) .. مثلك
أنا مش محلل مالي .. ولا اقتصادي أكاديمي
أنا مجرد مستثمر .. لي تجربة من ٢٠٠٥ تقريبا
علمتني التجربة دروس كثيرة .. وبحثت في أسئلة
كثيرة .. ما لقيت إجاباتها بسهولة
فقررت أجمع كل ما تعلمت في هذي التجربة
وأشاركها مع الناس .. كل من يهتم بعالم
الاستثمار في الأسواق المالية
بكل بساطة وبدون تعقيد
طيب .. كيف ممكن يفيدك بو سالم ؟
تقدر تعتبر نفسك مسافر تدرس في دولة أجنبية
وتعرفنا على بعض هناك .. وأنا أنقل لك تجربتي
في هذي الدولة .. فقط لا غير
هذا لا يعني بأن طريقتي هي الصحيحة فقط
لا .. لكل الطرق والمدارس الاحترام والتقدير
أنا مقتنع بأن كل طريق حلال .. ويطلع فلوس صحيح
والطرق اللي تسبب لك الخساير المستمرة
غالبا غير صحيحة أو تحتاج المراجعة
شو هي فلسفتي في قراءة الشركات ؟
بو سالم ما يحب يتابع الأخبار أبدا
أخوك مؤمن بأن الأخبار يمكن التلاعب فيها بسهولة
وبدون ما تتم مخالفة أي قوانين سارية
وبالتالي أخوك سليمان يحب يقرأ البيانات المالية
للشركات .. ومن خلالها يحاول يقيم كل شركة
وصنع لنفسه أربع معايير رئيسية .. هي
وهي .. ببساطة .. الهدف الأساسي من إنشاء أي
شركة أو نشاط تجاري .. فلما ندرس أي شركة
يجب علينا نشوف قدرة الشركة على تحقيق الربحية
لأن الشركة اللي غير ناجحة في الربح
غالبا فيها مشكلة
فنحن نشوف صافي أرباحها .. وغالبا أي رقم فوق
الـ ١٠٪ يعتبر جيد
أيضا نشوف الأرباح هذي كيف مقارنة بأصولها
هل الشركة ناجحة في استغلال أصولها
لتوليد الأرباح .. أيضا فوق الـ ١٠٪ جيد
وآخر شي نشوف هذي الأرباح .. هل دخلت
الشركة على شكل كاش حقيقي .. وإلا هي
مجرد أرقام على الورق
كفاءة توليد الأرباح
بعد ما نتأكد بأن الشركة ناجحة في توليد الأرباح
يصبح الهدف الثاني هو ديون الشركة
تخيل نفسك بنك .. وقاعد تقيم عميل مقدم على قرض
أول شي شفنا دخل الشركة .. وبعدها نشوف الالتزامات
اللي عليها .. هل هي كبيرة وإلا مسيطر عليها
وهنا نحن نشوف إلتزامات الشركة مقابل إجمالي أصولها
وغالبا من الجميل لو كانت النسبة تحت الـ ٥٠٪
في القطاع المصرفي راح تشوف النسبة أكبر
وهذا طبيعي .. لأن الإلتزامات أغلبها ودائع العملاء
ولهذا السبب نحن نشوف المعيار الثاني
نسبة الإلتزامات اللي عليها فوائد .. يعني ديون
بنكية .. أو سندات وصكوك تدفع الشركة عليها فوائد
وهذي أيضا جميل لو كانت النسبة تحت الـ ٥٠٪
الشركات اللي ما تحقق هذا الشرط تتعب كثير
لما الفدرالي الأمريكي يرفع الفائدة .. لأن تكاليف
التمويل تصبح عالية
كفاءة إدارة الديون
الآن وبعد ما عرفنا بأن الشركة ناجحة في
توليد الأرباح وأيضا الإدارة تبذل جهد جيد
في إدارة الديون
أصبح دورنا نشوف .. لو اشترينا سهم الشركة
بسعر اليوم .. هل هذا السعر مناسب استثماريا
بالنسبة لنا
وفي هذا الجزء أول شي أنا أحب أشوفه هو
أرباح الشركة مرة ثانية .. ولكن أقارنها مع
سعر السهم الحالي
صافي الأرباح يقولك كم بقى ربح من الإيرادات
أما المقارنة مع السعر الحالي يقولك هل سعر
السهم جيد وإلا متضخم نوعا ما
وبشكل عام في الأسواق الخدمية مثل أسواقنا
الخليجية .. أي رقم حول الـ ١٠٪ جميل
ليش؟ لأن شركاتنا أساسا شركات توزيع أرباح
وقليل من أرباحها تروح للبحث والتطوير
أما أسواق الانتاج وبراءات الاختراع .. فهناك
النسبة بين ١-٣٪ تعتبر جميلة
ليش؟ لأن جزء مهم من الإيرادات يروح للبحث
والتطوير .. لدعم نمو الشركات وانتشارها
ثاني شي مهم .. هو التوزيعات النقدية
أنا يهمني أصنف الشركة .. هل هي شركة
توزيعات نقدية .. وإلا شركة نمو سعري
وإلا الاثنين مع بعض (هذيل جواهر)
التوزيعات الجيدة غالبا فوق ٤٪
وعلى طول اسأل نفسك .. هل الأرباح
قادرة تغطي التوزيعات النقدية .. وإلا لا
وهذا ثالث أهم شي .. تغطية الأرباح للتوزيعات
وأي رقم فوق ال ١٠٠٪ يعتبر جميل
تحت الـ ١٠٠٪ .. يعني إن الشركة قاعدة
تاخذ من احتياطاتها حتى تعطيك أرباح
وهذا شيء غير جيد على المدى الطويل
آخر الأشياء المهمة في هذا الجزء هو
متوسط النمو السنوي لسعر السهم
هنا أعرف بأن أنا راح آخذ توزيعات بس
وإلا سعر السهم يزيد بعد مع التوزيعات
وهنا أي رقم فوق الـ ١٠٪ جميل
باختصار .. من هذي البيانات الأربع
نقدر نقيم بأن السهم رخيص وإلا غالي
نقدر نعرف هل هو سهم توزيعات بس وإلا
نمو بس .. وإلا الاثنين مع بعض
الجدوى الاستثمارية للمساهمين
من الثلاث معايير اللي فوق .. نكون خلصنا
تحليل السهم تقريبا .. وعرفنا هل يستحق
الاهتمام وإلا لا
ولكن حلو لو نشوف وجهة نظر المحللين
الماليين أيضا .. ونقارن تحليلنا معاهم
بتشوفون في هذا الجزء من صفحة كل سهم
المحللين وين يتوقعون سعره العادل
وفي نفس الوقت تقييم أخوكم بو سالم
للسهم من ١٠٠ .. اللون الأخضر يعني
يستحق الاهتمام .. والبرتقالي خطر
هذا التقييم حسبته بناء على كل شي
شرحته لكم فوق .. يعني ما في معادلة
سحرية في الموضوع
لو شفتوا تقييمنا أخضر .. والمحللين
يعطونا سعر عادل أعلى من سعره الحالي
فهذا شي جميل إن شاء الله
يمكن يكون فرصة تستحق الدراسة
وإذا اختلفنا في التقييم .. أو اتفقنا على عدم
جدوى الاستثمار في السهم حاليا
فالأفضل إنك تدرس السهم
بشكل تفصيلي أكثر وأكثر
هذي هي فلسفة بو سالم في التحليل
بكل بساطة وبدون تعقيد
توقعات وتقييم المحللين
